Contoh Dharma Wacana berbahasa Bali

LUH LUWIH SATYENG LAKI

Om Swastyastu,

Ida dane sane dahat wangiang tityang, sekadi sane sampun keuninggin aab jagate mangkin kenyekan jagat Kali Yuga. Pracirin ipun akeh pisan wetu parilaksane sane singsal sane nenten manut ring ajah-ajahan Sang Hyang Agama sane ngawinang ical tatakramane. Duaning asapunika sane mangkin mabuat pisan mangda sami ugi nincapang ajah-ajahan Sang Hyang Agama, sapatutnyane sampun keicen saking kantun alit mawiwit saking kulawarga. Sane kelaksanayang utamannyane olih anake istri utawi paperagayan i biang.

Ida dane, ring sajeroning pasikian kulawarga sekadi mangkine akuweh pisan mawetu pikobet utawi kabramantian ring sajroning kulawarga turmaning kantos maseyang, tur akeh kewentenannyane kantos banget nyurudang kasobagyan kulawargane. Sekadi sane sampun kasobyahang manut ring Undang-undang Perkawinan no 1 tahun 1974 pasal 1, yening ojah tityang antuk Base Bali teges ipun inggih punika pawiwahan merupa paiketan angga sarira lanang lan istri ring sekala lan niskala sane matetujon ngewangun kulawarga manut ring agama soang-soang.. Melarapan antuk sane kinucap ring ajeng punika, sampun tuges pisan seantukan pawiwahan punika nenten dados maimpasan saking Sang Hyang Agama. Pawiwahan boya ja amung nagingin pikayun raga kewanten, nanging pebuate taler nagingin pikayun kemotaman ring sarira. Pidabdabe kinucap ring ajeng manut kekecap Atharwaveda VII. 36. 1 sane nyoatahang pawiwahan marupa penunggalan raga sarira sang alaki-rabi, nunggalang raga sarira ring sajeroning makekalih. Istri wantah pangiket rasa kasih rabi, nenten dados palasang sareng rabi kinucap dampati duaning makakalih punika sigaran raga. Pawiwahan taler kinucap sakral sane patut gamel kasuciannyane. Ring mantram rgveda 10.85.36. katugesang santukan pawiwahan kamargiang mangda sida manggih bagya ring jagate tetujone ngemolihang moksa ring sekala lan niskala. Duaning asapunika sang maraga purusa patut ngincepang ring kayun mangda stata dados rabi sane malaksana becik, prasida saling ngajinin pakayunane ritatkala ngamarginin grehasta asrama lan nenten malih madue pakayunan sareng anak lianan. Pawiwahan punika kasaksian antuk ida Sang Hyang parama Kawi, punika meteges mangda sampunang patemon pawiwahan matetujon sekadi nyaluk baju, mangkin saluk selantur ipun makelesang. Sepatutne suka duka kauripan puniki kamargiang sareng-sareng mangda kantos kawekas. Ring sajroning kulawarga anak istri Hindu, madruwe linggih matekeh utama, Yajurveda XIV.22. nyoatahang ngeninin kemotaman anak istri, inggih punika merupa tekeh sane anggen nuntunin  kulawarga. Istri punika maperagayan Dewi Sri sane jagi ngardinin kulawargan duwene jagadhita, mapan anak istri punika merupa stana kulawarga. Manut kakecap Brahmagranta nyoatahang : yan nenten wenten anak istri saluiring yadnya nenten ja pacang jangkep paripurna yadnya punika. Punika sane ngawinang anake istri dados pangerajeg ritatkala kawentenang upacara yadnya. Sejaba punika taler mungguh ring kakecasp Manawa Dharmasastra kasobyahang duaning yen anake istri kasungkemin ring sajeroning kulawarga, irika janten Dewatane jagi melingga, nanging tungkalikan ipun ngawinang kulawarga punika pacang ruug manggihin papa neraka. Manut ring kakawin niti sastra kinucap “Ring stri putra palania ring surata len sardula wikridita” teges ipun anake istri punika palan ipune iring meledang kayun sekadi macane macanda. ida dane yening sida nyayangin para istrine waluya sida macande sareng I macan, sakemawon yening nenten sida ngalemin istri punika jagi nadosang kasungkawa, punika mawinan patut ajinin para istrine.Indike asapunika maka cihna sekalannyane kakecap ring Itihasa Mahabharata ri kenyekan Ida Dewi Drupadi kepekerangin antuk Sang Korawa, ring pamuput ipun ngawinang ngamangguh ruug naraka Sang Korawa.

          Ida dane sane wangiang tityang ri kenjekan jagat post modern sekadi mangkin, anak istri Hindu nenten wantah maparagayan rabi utawi biang nanging taler sareng ngerereh pangupa jiwa. Punika mawinan akidik pisan polih matemuwirasa sareng kulewarga soang-soang. Nanging kawiyaktiane pidabdabe asapunika boya ja matetujon ngelempasin swadharmane. Maka cihna sekalannyane anak istri Hindu setata mresidayang ngepah galahe pacang ngembanang kulawarga lan mekarya ngerereh pangupa jiwa taler mayah-ayahan ring sajeroning karma.

Ida dane sane wangiang tityang sajeroning galahe becik sekadi mangkin tityang taler pacang nguningayang ngeninin swadharma anak istri ring agama Hindu. Sekadi mangkin tityang cager pisan ring ida dane para istri sane wenten iriki sampun ngemargiang swadharmane sane patut nanging becikan malih yening iraga sida nelekang napi sepatut ipun swadharma istri manut Agama Hindu. Ring sajeroning Catur Weda kinucap peragayan anak istri katunasin kasatyaan turmaning kapagehan nyane ring anake lanang, anak istri ketunasin mangda seneng ngamargiang upakara yadnya, seneng ngamargiang pangubakti ring Ida Sang Hyang Widhi, ngembasang oka turmaning ngicen paajah-ajah mangdane sida dados oka sane kaucap suputra, plapan turmaning lascarya ring kawentenan kulawarga, plapan ring sajeroning ngicen pangendika, nuut pakayun anak lanang, subhakti ring rabi lan matua taler stata tragia, ida dane punika among unteng . danging-daging swadharma anake istri manut ring sastra Agama Hindu sayewaktinnyane kantun akeh sane lianan. Wenten sasuluh sane dangan anggen papineh sekadi satwan ipun I Jodha Akbar, sapunapi kasatyaan ratu Jodha mantuka ring I Jalal yadiastun patemonnyane nenten madasar antuk rasa teresna, nanging nganutin tatakrama lan sastra agama  ratu Jodha satya lan kukuh ngamel semaya pawiwahan sane suci, yadiastun sampun kaaranin mamitra. Sapunika taler Raja Jalal sane taler kukuh ngemargiang semaya turmaning nyaga kautamayan lan kasucian I Jodha yadiastun ipun madue kuasa sawireh sampun meraga rabi. Punika merupa sesuluh sane wiakti mabuat pisan, indik dados anak istri sane utame satyeng laki. Yening telek pinehin ida dane, sapunapi bobot kapatutan anak istri ring Hindu, napi malih kenyekan aab jagate sane kasengguh “Post modern” sekadi mangkin akeh pisan pakibeh tatakrama parajanane sane ngawetuwang pidabdab tan manut utawi singsal ring sajeroning tatekeh ajah-ajahan agama sekadi kadaut antuk narkoba, kekerasan rumahtangga, eksploitasi anak alit, tur makweh sane lianan. Puniki sane ngawinang iraga maraga istri Hindu mangda sumeken nyaganin angga mangda wiakti sida nginkinang raga lan kulawarga saking napi sane kaucap tan manut inunian. Ring sajeroning kawentenan jagate mangkin kapagehan anak istri Hindu sayewakti kauji mangda pantes kaucap anak istri luwih satyeng laki sane maduwe kamotaman turmaning satya ngamargiang swadharma stri ring sang rabi.

Ida dane sane banget utamayang tityang ngeninin napi sane sampun uningayang tityang ring ajeng yen ringkes tityang wenten tatiga papalihan ipun :

1      Patemon wiwaha ring hindu kinucap sakral tur kasuciang mawinan lanang utawi istri patut nyaganin dharman patemon duene mangda prasida mangguhang Moksartham Jagadhita.

2      Ngeninin kautamaan anak istri sekadi mungguh ring pustaka suci Weda ngamong kakukuhan angga taler ngukuhang pamargi sane utama, tur neraka sane pacang nibenin sang sapasira ugi sane nenten ngajinin anak istri.

3      Ngeninin swadharma anak istri Hindu tingkahe ngamong paayah-ayahan ring rabi turmaning kulawarga, sane ngawinang patut kinucap anak istri luwih satyeng laki.

Inggih asapunika sane prasida aturang tityang ring galah sekadi mangkin, turmaning nenten lali tityang nunas gung rena sinampura yening wenten atur miwah tata titi sane nenten manut ring pakayunan ida dane sareng sami. Angayubagya tityang ngaturang parama santi

Om Santih, Santih, Santih Om